Category: ಕೈಗಾರಿಕೆ

ಆನ್​ಲೈನ್ ಫುಡ್​ ಡೆಲಿವರಿ ಕಂಪೆನಿ ಝೊಮ್ಯಾಟೋದಿಂದ ಜುಲೈ 14ನೇ ತಾರೀಕು ಐಪಿಒ (Zomato IPO) ಬಿಡುಗಡೆ ಮಾಡಲಾಗಿದ್ದು, ಜುಲೈ 16ನೇ ತಾರೀಕು ಸಬ್​ಸ್ಕ್ರಿಪ್ಷನ್ ಕೊನೆಯಾಗಲಿದೆ. ಈ ಐಪಿಒಗೆ ಯುವ ತಲೆಮಾರು, ಮೊದಲ ಬಾರಿಗೆ ಹೂಡಿಕೆ ಮಾಡುತ್ತಿರುವವರು ಭಾರೀ ಆಸಕ್ತಿ ತೋರುತ್ತಿದ್ದಾರೆ ಎಂದು ಪೇಟಿಎಂ ಮನಿ ತಿಳಿಸಿದೆ. ಗಮನಾರ್ಹ ಸಂಗತಿ ಏನೆಂದರೆ, ಪೇಟಿಎಂ ಮನಿ ಮೂಲಕ ಝೊಮ್ಯಾಟೋ ಐಪಿಒಗೆ ಅರ್ಜಿ ಹಾಕಿರುವವರ ಪೈಕಿ ಶೇ 55ರಷ್ಟು ಮಂದಿ 30 ವರ್ಷ ವಯಸ್ಸಿನ ಒಳಗಿನವರು. ಮೊದಲ ದಿನದ ಲೆಕ್ಕಾಚಾರವನ್ನು ಮುಂದಿಟ್ಟಿರುವ ಪೇಟಿಎಂ ಮನಿ, ಶೇ 60ರಷ್ಟು ಮಂದಿ 30 ವರ್ಷದೊಳಗಿನವರು. ಇದನ್ನು ಇನ್ನೂ ಕೂದಲು ಸೀಳುವಂತೆ ಹೇಳುವುದಾದರೆ, ಶೇ 27ರಷ್ಟು ಮಂದಿ 25 ವರ್ಷ ವಯಸ್ಸಿನೊಳಗಿವರು. ಇನ್ನೂ ಒಂದು ಪ್ರಮುಖ ಸಂಗತಿ ಏನೆಂದರೆ, ಮೊದಲ ದಿನ ಅರ್ಜಿ ಹಾಕಿಕೊಂಡವರ ಪೈಕಿ ಶೇ 10ರಷ್ಟು ಮಹಿಳೆಯರಿದ್ದಾರೆ. ಪೇಟಿಎಂ ಮನಿ ಪ್ಲಾಟ್​ಫಾರ್ಮ್​ನಲ್ಲಿ ಈ ಹಿಂದಿನ ಐಪಿಒಗಳಿಗೆ ಮೊದಲ ದಿನ ಬರುತ್ತಿದ್ದ ಅರ್ಜಿಯ ಸಂಖ್ಯೆಗಿಂತ ಝೊಮ್ಯಾಟೋಗೆ ಶೇ 20ರಷ್ಟು ಜಾಸ್ತಿ ಬಂದಿದೆ ಎಂದು ತಿಳಿಸಲಾಗಿದೆ.

ಪೇಟಿಎಂ ಮನಿ ಎಂಬುದು ಫಿನ್​ಟೆಕ್​ ಆದ ಪೇಟಿಎಂನ ವೆಲ್ತ್​ ಮ್ಯಾನೇಜ್​ಮೆಂಟ್ ವಿಭಾಗದ. ಐಪಿಒ ಸಬ್​ಸ್ಕ್ರಿಪ್ಷನ್ ಆರಂಭವಾಗುವ ಕೆಲ ದಿನಗಳ ಮುಂಚೆಯೇ ಬಳಕೆದಾರರು ಅದಕ್ಕೆ ಅಪ್ಲೈ ಮಾಡುವ ಫೀಚರ್​ ಅನ್ನು ಘೋಷಣೆ ಮಾಡಿದೆ. ಈ ಫೀಚರ್ ಅನ್ನು ಪ್ರೀ ಓಪನ್ ಐಪಿಒ ಅಪ್ಲಿಕೇಷನ್ ಎಂದು ಕರೆಯಲಾಗುತ್ತದೆ. ಐಪಿಒಗಳಲ್ಲಿ ರೀಟೇಲ್ ಹೂಡಿಕೆದಾರರು ಹೆಚ್ಚಿನ ಸಂಖ್ಯೆಯಲ್ಲಿ ಪಾಲ್ಗೊಳ್ಳಬೇಕು ಎಂಬ ಕಾರಣಕ್ಕೆ ಈ ಫೀಚರ್ ಪರಿಚಯಿಸಲಾಗಿದೆ. ಝೊಮ್ಯಾಟೋ ಐಪಿಒ ಈ ಫೀಚರ್​ ಅನ್ನು ಬಳಸಿಕೊಂಡ ಮೊದಲ ಕಂಪೆನಿಯಾಗಿದೆ. ಬಳಕೆದಾರರು ಇನ್ನೂ ಹೆಚ್ಚು ಸಕ್ರಿಯವಾಗಿ ಪಾಲ್ಗೊಳ್ಳುವುದಕ್ಕೆ ಅನುಕೂಲ ಆಗುವ ನಿಟ್ಟಿನಲ್ಲಿ ಒನ್-ಕ್ಲಿಕ್ ಐಪಿಒ ಅಪ್ಲಿಕೇಷನ್, ಷೇರುದಾರರ ವಿಭಾಗದ ಅಡಿಯಲ್ಲಿ ಐಪಿಒ ಅಪ್ಲಿಕೇಷನ್ ಮತ್ತು ಲೈವ್ ಐಪಿಒ ಸಬ್​ಸ್ಕ್ರಿಪ್ಷನ್ ಸಂಖ್ಯೆಯ ಟ್ರ್ಯಾಕಿಂಗ್ ಇವೆಲ್ಲ ಫೀಚರ್ಸ್ ತಂದಿದೆ.

ಝೊಮ್ಯಾಟೋ ಐಪಿಒಗೆ ಈ ಪರಿಯ ಪ್ರತಿಕ್ರಿಯೆ ಬರುವುದಕ್ಕೆ ಕಾರಣ ಆಗಿರುವುದು ಸಣ್ಣ ಮತ್ತು ಪಟ್ಟಣಗಳ ಹೂಡಿಕೆದಾರರ ಭಾಗವಹಿಸುವಿಕೆ. ಸಾಮಾನ್ಯವಾಗಿ ಮುಂಬೈ, ದೆಹಲಿಯಂಥ ಮೆಟ್ರೋ ನಗರಗಳ ಹೂಡಿಕೆದಾರರು ಸಿದ್ಧವಾಗಿ ಐಪಿಒಗಳಲ್ಲಿ ಭಾಗಿ ಆಗಿದ್ದಾರೆ. ಜತೆಗೆ ಸಣ್ಣ ಪ್ರದೇಶಗಳವರೂ ಪಾಲ್ಗೊಂಡಿದ್ದಾರೆ. ಗುಜರಾತ್​ನ ಕೊಡಿನರ್, ನಾಗಾಲ್ಯಾಂಡ್​ನ ತ್ಯುನ್​ಸಂಗ್ ಮತ್ತು ಅಸ್ಸಾಂನ ರಂಗಾಪುರದಂಥ ಸ್ಥಳಗಳಿಂದಲೂ ಈ ಐಪಿಒನಲ್ಲಿ ಭಾಗವಹಿಸಿದ್ದಾರೆ. ಐಪಿಒ ಸಬ್​ಸ್ಕ್ರಿಪ್ಷನ್​ನ ಆರಂಭದ ದಿನವೇ ಹೆಚ್ಚು ಬೇಡಿಕೆ ಪಡೆದಿದೆ. ರೀಟೇಲ್ ಹೂಡಿಕೆದಾರರಿಗೆ ಮೀಸಲಿರುವ ಷೇರುಗಳಿಗಿಂತ 2.7 ಪಟ್ಟು ಹೆಚ್ಚು ಬೇಡಿಕೆ ಸಲ್ಲಿಸಿದ್ದಾರೆ. ಇನ್ನು ಪಿಟಿಐ ಸುದ್ದಿ ಸಂಸ್ಥೆ ಬಿಡುಗಡೆ ಮಾಡಿರುವ ಮಾಹಿತಿಯ ಪ್ರಕಾರ, ಝೊಮ್ಯಾಟೋದ ಐಪಿಒ ಗಾತ್ರ ರೂ. 71.92 ಕೋಟಿಯಾದರೆ, ಮೊದಲ ದಿನವೇ ರೂ. 75.60 ಕೋಟಿ ರೂಪಾಯಿಯ ಈಕ್ವಿಟಿ ಷೇರಿಗೆ ಬಿಡ್ಡಿಂಗ್ ಬಂದಿದೆ. ಇನ್ನು ಉದ್ಯೋಗಿಗಳಿಗಾಗಿ ಮೀಸಲಿಟ್ಟಿರುವ ಪ್ರಮಾಣದಲ್ಲಿ ಶೇ 18ರಷ್ಟು ಸಬ್​ಸ್ಕ್ರೈಬ್ ಆಗಿದೆ.

ಇಲ್ಲಿಯ ತನಕದ ಲೆಕ್ಕ ನೋಡಿದರೆ, ಮಾರುಕಟ್ಟೆಯಲ್ಲಿ ಈ ವರ್ಷದ ಅತಿ ದೊಡ್ಡ ಐಪಿಒ ಇದು. ಶುಕ್ರವಾರದ ತನಕ ಇರುತ್ತದೆ. ಪ್ರತಿ ಷೇರಿಗೆ 72 ರೂ.ನಿಂದ 76 ರೂಪಾಯಿ ದರದ ಬ್ಯಾಂಡ್ ನಿಗದಿ ಆಗಿದೆ. ಆರಂಭದಲ್ಲಿ ಐಪಿಒ ಗಾತ್ರ 9,375 ಕೋಟಿ ರೂಪಾಯಿ ಎಂದು ಅಂದಾಜಿಸಲಾಗಿತ್ತು. ಆದರೆ ನಂತರದಲ್ಲಿ ಅದನ್ನು 5178 ಕೋಟಿ ರೂಪಾಯಿಗೆ ಇಳಿಸಲಾಯಿತು. ಜುಲೈ 13ನೇ ತಾರೀಕಿನಂದೇ ಝೊಮ್ಯಾಟೋ 186 ಆಂಕರ್ ಹೂಡಿಕೆದಾರರಿಂದ 4,196.51 ಕೋಟಿ ರೂಪಾಯಿ ಸಂಗ್ರಹಿಸಿಯಾಗಿದೆ.

ಆಪಲ್ ಕಂಪೆನಿಯನ್ನು ಹಿಂದಿಕ್ಕಿರುವ ಶಿಯೋಮಿ ವಿಶ್ವದ ಎರಡನೇ ಅತಿದೊಡ್ಡ ಸ್ಮಾರ್ಟ್​ಫೋನ್ ತಯಾರಕ ಆಗಿದೆ. ಚೀನಾ ಮೂಲದ ಸ್ಮಾರ್ಟ್‌ಫೋನ್ ತಯಾರಕ ಕಂಪೆನಿಯು ಸ್ಥಳೀಯ ಪ್ರತಿಸ್ಪರ್ಧಿ ಹುವೈ ಅಂತ್ಯದೊಂದಿಗೆ ಲಾಭ ಪಡೆದಿದೆ. ಮತ್ತು ಈಗ ಸ್ಯಾಮ್‌ಸಂಗ್‌ನ ಅಗ್ರ ಸ್ಥಾನದಲ್ಲಿದೆ. ಕ್ಯಾನಲಿಸ್ ಬಿಡುಗಡೆ ಮಾಡಿದ ಇತ್ತೀಚಿನ ಅಂಕಿಅಂಶಗಳ ಪ್ರಕಾರ, 2021ರ ಎರಡನೇ ತ್ರೈಮಾಸಿಕದಲ್ಲಿ, ಶಿಯೋಮಿ ಮಾರಾಟದ ದೃಷ್ಟಿಯಿಂದ ಜಾಗತಿಕವಾಗಿ ಎರಡನೇ ಅತಿದೊಡ್ಡ ಸ್ಮಾರ್ಟ್​ಫೋನ್ ತಯಾರಕ ಸಂಸ್ಥೆಯಾಗಿದೆ. ದಕ್ಷಿಣ ಕೊರಿಯಾದ ಸ್ಮಾರ್ಟ್‌ಫೋನ್ ತಯಾರಕ ಸ್ಯಾಮ್ಸಂಗ್ ಶೇಕಡಾ 19 ರಷ್ಟು ಮಾರುಕಟ್ಟೆ ಪಾಲನ್ನು ಹೊಂದಿದೆ. ಶಿಯೋಮಿಯು ಸ್ಪರ್ಧೆಯ ಅಂತರವನ್ನು ಸಾಕಷ್ಟು ಕಡಿಮೆ ಮಾಡಿದ್ದು, ಶೇಕಡಾ 17ರಷ್ಟು ಮಾರುಕಟ್ಟೆ ಪಾಲನ್ನು ಹೊಂದಿದೆ. ಶಿಯೋಮಿಯ ಶಿಪ್​ಮೆಂಟ್ ಲ್ಯಾಟಿನ್ ಅಮೆರಿಕಾದಲ್ಲಿ ಶೇಕಡಾ 300ಕ್ಕಿಂತಲೂ ಹೆಚ್ಚಾಗಿದ್ದು, ಆಫ್ರಿಕಾದಲ್ಲಿ ಶೇ 150 ಮತ್ತು ಪಶ್ಚಿಮ ಯುರೋಪಿನಲ್ಲಿ ಶೇ 50ರಷ್ಟು ಹೆಚ್ಚಾಗಿದೆ. ಎಂಐ 11 ಅಲ್ಟ್ರಾನಂತಹ ಫೋನ್‌ಗಳ ಮಾರಾಟವನ್ನು ಹೆಚ್ಚಿಸುವುದು ಶಿಯೋಮಿಯ ಉದ್ದೇಶವಾಗಿರಬೇಕು ಎಂದು ಕ್ಯಾನಲಿಸ್ ಹೇಳಿದೆ. ಆದರೆ ಸ್ಮಾರ್ಟ್‌ಫೋನ್ ತಯಾರಕ ಕಂಪೆನಿಯಾದ ಶಿಯೋಮಿಗೆ ಚೀನಾದ ಇತರ ಬ್ರಾಂಡ್‌ಗಳಾದ ಒಪ್ಪೊ ಮತ್ತು ವಿವೊಗಳಿಂದ ಸವಾಲು ಎದುರಿಸಬೇಕಾಗಿದೆ.

ಆದರೂ ಶಿಯೋಮಿ ಕಂಪೆನಿಯು ಸ್ಯಾಮ್ಸಂಗ್ ಅನ್ನು ಹಿಂದಿಕ್ಕಲು ಉತ್ತಮ ಅವಕಾಶವನ್ನು ಹೊಂದಿದೆ. ಮತ್ತು ಈ ವೇಗದಲ್ಲಿ ಮಾರಾಟ ಸಾಗಿದರೆ ವಿಶ್ವದ ನಂಬರ್ 1 ಸ್ಮಾರ್ಟ್‌ಫೋನ್ ಬ್ರಾಂಡ್ ಆಗಬಹುದು ಎಂದು ಸಂಖ್ಯೆಗಳು ಸೂಚಿಸುತ್ತವೆ. ಇದೇ ಮೊದಲ ಬಾರಿಗೆ ಸ್ಯಾಮ್ಸಂಗ್ ಮತ್ತು ಆಪಲ್ ಕಂಪೆನಿಯನ್ನು ಮೊದಲ ಎರಡು ಸ್ಥಾನದಿಂದ ಬದಿಗೆ ಸರಿಸುವಂತಹ ಸಾಮರ್ಥ್ಯವನ್ನು ಶಿಯೋಮಿ ತೋರುತ್ತಿದೆ. ಇದಕ್ಕೆ ಪ್ರಮುಖ ಕಾರಣವಾಗಿ ಕಂಡುಬರುವುದು ಮಿಡ್​ ಪ್ರೀಮಿಯಂ ವಿಭಾಗ, ನೋಟ್ 10 ಅನಾವರಣ ಮತ್ತು ಎಂಐ ಸರಣಿಯ ಸ್ಮಾರ್ಟ್‌ಫೋನ್‌ಗಳು.

ಆಪಲ್ ಈಗ ಶೇಕಡಾ 14 ರಷ್ಟು ಮಾರುಕಟ್ಟೆ ಪಾಲನ್ನು ಹೊಂದುವ ನಾಲ್ಕನೇ ಸ್ಥಾನಕ್ಕೆ ತಳ್ಳಲ್ಪಟ್ಟಿದೆ. ಆದರೆ ಒಪ್ಪೋ ಮತ್ತು ವಿವೊ ತಲಾ ಶೇ 10 ರಷ್ಟು ದೊಡ್ಡ ಬೆಳವಣಿಗೆಯನ್ನು ಹೊಂದಿವೆ. ಆದರೂ 2020ರ ಎರಡನೇ ತ್ರೈಮಾಸಿಕದಲ್ಲಿ ಶಿಯೋಮಿಯ ಶೇಕಡಾ 83ರ ಬೆಳವಣಿಗೆಗೆ ಹೋಲಿಸಿದರೆ ಇದು ಏನೂ ಇಲ್ಲ. ಪ್ರೀಮಿಯಂ ಸ್ಮಾರ್ಟ್‌ಫೋನ್ ಮಾರುಕಟ್ಟೆಯಿಂದ ಹುವೈ ನಿರ್ಗಮಿಸಿದ್ದರಿಂದ ಖಾಲಿಯಾದ ಸ್ಥಳವನ್ನು ತುಂಬಲು ಹೆಚ್ಚಿನ ಬ್ರ್ಯಾಂಡ್‌ಗಳು ಯತ್ನಿಸುತ್ತಿವೆ. ಬಹಳ ಹಿಂದೆಯೇ ಹುವೈ ಕಂಪೆನಿಯು ಆಪಲ್ ಅನ್ನು ಪಕ್ಕಕ್ಕೆ ಸರಿಸುವಲ್ಲಿ ಯಶಸ್ವಿಯಾಗಿತ್ತು ಮತ್ತು ಸ್ಮಾರ್ಟ್​ಫೋನ್ ತಯಾರಕರಲ್ಲಿ ಎರಡನೇ ಸ್ಥಾನವನ್ನು ಗಳಿಸಿತ್ತು. ಆದರೂ ಶೀಘ್ರದಲ್ಲೇ ಅದರ ಮೇಲೆ ನಿರ್ಬಂಧಗಳನ್ನು ವಿಧಿಸಲಾಯಿತು ಮತ್ತು ಕಂಪೆನಿಯು ಅಂತಿಮವಾಗಿ ಹೈ ಎಂಡ್ ಪ್ರೀಮಿಯಂ ಫೋನ್ ಮಾರುಕಟ್ಟೆಯಿಂದ ಹಿಂದೆ ಸರಿಯಿತು.

ಆ ನಂತರ ಶಿಯೋಮಿ, ಒನ್‌ಪ್ಲಸ್ ಮತ್ತು ಇತರ ಕಂಪೆನಿಗಳು ಹುವೈನಿಂದ ಖಾಲಿಯಾದ ಸ್ಥಳವನ್ನು ತುಂಬಲು ಪ್ರಯತ್ನಿಸುತ್ತಲೇ ಇವೆ. ಬೆಳೆಯುತ್ತಿರುವ ಸ್ಪರ್ಧೆಯ ಮಧ್ಯೆ ಮುಂದಿನ ಕೆಲವು ತ್ರೈಮಾಸಿಕಗಳಲ್ಲಿ ಶಿಯೋಮಿ ಸ್ಥಾನವನ್ನು ಉಳಿಸಿಕೊಳ್ಳುತ್ತದೆಯೇ ಎಂದು ಕಾದು ನೋಡಬೇಕಾಗಿದೆ.